دہلی این سی آر میں زلزلے کے تیز جھٹکے، پاکستان میں بھی لرزی زمین، افغانستان کے ہندوکش میں تھا مرکز

 

نئی دہلی : دہلی-این سی آر میں زلزلے کے شدید جھٹکے محسوس کئے گئے ہیں۔ زلزلہ اتنا شدید تھا کہ لوگوں نے دیر تک اس کے جھٹکے محسوس کئے۔ امریکی جیولوجیکل سروے (یو ایس جی ایس) کے مطابق اس زلزلے کا مرکز افغانستان کے صوبہ ہندوکش کے علاقے جورم میں تھا۔ یہاں آئے پہلے زلزلے کی شدت ریکٹر اسکیل پر 4.1 تھی جب کہ دوسرا زلزلہ اس سے بھی زیادہ شدید تھا جس کی شدت 6.4 تھی۔

یکے بعد دیگرے آئے ان دوہرے زلزلوں کے شدید جھٹکوں سے لوگ خوف زدہ ہو کر گھروں اور دفاتر سے باہر نکل آئے۔ فی الحال اس زلزلے سے کسی جانی و مالی نقصان کی کوئی خبر نہیں ہے۔ افغانستان میں زلزلے کی شدت 6.1 ریکارڈ کی گئی جس کے جھٹکے شمالی ہندوستان کے کچھ حصوں میں بھی محسوس کیے گئے۔ نیشنل سیسمولوجی سینٹر نے یہ اطلاع دی۔

ہندوستانی وقت کے مطابق دوپہر 2 بج کر 50 منٹ پر آئے زلزلے کا مرکز کابل سے 241 کلومیٹر شمال، شمال مشرق میں تھا۔ زلزلے سے لوگوں میں خوف وہراس پھیل گیا۔ دہلی اور قومی راجدھانی علاقہ میں بہت سے لوگوں نے بتایا کہ انہوں نے زلزلے کے جھٹکے محسوس کئے۔ دہلی این سی آر کے علاوہ کشمیر ، پنجاب اور پاکستان میں بھی زلزلے کے جھٹکے محسوس کئے گئے ۔