دہلی میں ایک المناک حادثہ:گوکل پوری میٹرو اسٹیشن کاایک حصہ گرگیا ، 3سے4افراد زخمی

 

نئی دہلی: دہلی میں ایک المناک حادثہ اس وقت پیش آیا جب گوکل پوری میٹرو اسٹیشن کا ایک حصہ گر گیا اور کئی لوگ اس کے ملبے تلے دب گئے۔ جمعرات کو گوکل پوری میٹرو اسٹیشن کے پلیٹ فارم کی سائیڈ دیوار کا ایک حصہ گر گیا۔ جس سے لوگوں میں خوف و ہراس پھیل گیا۔ خدشہ ہے کہ اس سلیب کے ملبے تلے کچھ لوگ دبے ہو سکتے ہیں۔ ڈی ایف ایس ملازمین نے ایک شخص کو ملبے سے نکالا اور اسے قریبی اسپتال لے گئے۔ کچھ زخمیوں کو ڈی ایف ایس یونٹ کے پہنچنے سے پہلے ہی عام لوگوں نے اسپتال بھیجا تھا۔

دراصل، گوکل پوری میٹرو اسٹیشن حادثہ پر دہلی پولیس نے کہا کہ تقریباً 11 بجے انہیں اطلاع ملی کہ گوکل پوری میٹرو اسٹیشن کی باؤنڈری وال (مشرقی طرف) کا ایک حصہ نیچے سڑک پر گر گیا ہے۔ اس حادثے میں کم از کم 3 سے 4 افراد زخمی ہوئے ہیں۔ ایک شخص ملبے تلے دب کر شدید زخمی ہو گیا جبکہ دیگر کو معمولی چوٹیں آئیں۔ کچھ لوگوں کی مدد سے پولیس اہلکاروں نے ملبے میں پھنسے شخص کو باہر نکالا۔ واقعہ کے وقت وہ اپنے اسکوٹر پر سوار تھا۔ زخمی شخص کو جی ٹی بی اسپتال لے جایا گیا۔

پولیس کے مطابق زخمیوں کی شناخت کے لیے کوششیں کی جا رہی ہیں۔ مزید معلومات اکٹھی کی جا رہی ہیں۔ جے سی بی اور کرین کی مدد سے ملبہ ہٹایا جا رہا ہے۔ مقامی پولیس اور میٹرو ملازمین موقع پر موجود ہیں۔ اس معاملے میں قانون کی متعلقہ دفعات کے تحت مقدمہ درج کیا جائے گا اور فی الحال مزید تفتیش جاری ہے۔