آندھراپردیش: انکاپلی میں بڑاحادثہ، فارمایونٹ میں ری ایکٹرکے دھماکے میں 18افراد ہلاک ، 50 دیگرزخمی

 

وشاکھاپٹنم: آندھراپردیش کے انکاپلی ضلع میں بدھ کو ایک بڑا حادثہ پیش آیا۔ یہاں ایک فارما یونٹ میں ری ایکٹر کے دھماکے میں 18 افراد ہلاک اور 50 دیگر زخمی ہو گئے۔ دھماکا اچھوتا پورم اسپیشل اکنامک زون (ایس ای زیڈ) میں دوا ساز کمپنی "ایسنٹیا " میں لنچ بریک کے دوران ہوا۔ حکام نے بتایا کہ دوپہر کے کھانے کے وقفے کے دوران کمپنی کے احاطے میں دھماکے کے بعد زبردست آگ بھڑک اٹھی۔ ملازمین میں خوف و ہراس پھیل گیا اور وہ جان بچانے کے لیے باہر نکلے گئے۔ آگ بجھانے کے لیے فائر بریگیڈ کی کئی گاڑیاں موقع پر پہنچ گئیں۔ این ڈی آر ایف، فائر عملہ اور پولیس نے عمارت کی تیسری منزل پر پھنسےملازمین کو بچایا۔ زخمیوں کو انکاپلی کے مختلف اسپتالوں میں داخل کرایا گیا ہے۔(جاری)

حادثے کے وقت وہاں 300 افراد موجود تھے۔حکام کا کہنا ہے کہ زخمیوں میں سے کچھ کی حالت تشویشناک ہونے کی وجہ سے ہلاکتوں میں اضافہ ہوسکتا ہے۔ دھماکے کے وقت کمپنی میں 300 کے قریب ملازمین موجود تھے۔ دھماکہ اتنا زور دار تھا کہ عمارت کی پہلی منزل کا سلیب گر گیا۔ دھوئیں نے پورے علاقے کو اپنی لپیٹ میں لے لیا جس کی وجہ سے ریسکیو آپریشن میں مشکلات کا سامنا کرنا پڑا۔ دھماکے سے قریبی دیہات میں بھی لوگوں میں خوف وہراس پھیل گیا۔(جاری)

غفلت برتنے پر افسران کو سزا دینے کا مطالبہ

حادثے کے بعد ملازمین کمپنی کے باہر جمع ہوگئے اور متاثرین کے لیے معاوضہ اور غفلت پر افسران کو سزا دینے کا مطالبہ کیا۔ وزیر اعلیٰ این۔ چندرابابو نائیڈو نے دھماکے پر غم کا اظہار کیا ہے۔ انہوں نے انکاپلی کے ضلع کلکٹر سے بات کی اور صورتحال کے بارے میں جانکاری حاصل کی۔ انہوں نے عہدیداروں کو ہدایت دی کہ وہ زخمیوں کے بہتر علاج کو یقینی بنائیں۔سابق وزیراعلیٰ وائی ایس جگن موہن ریڈی نےپر اس حادثہ پر افسوس کا اظہار کیا۔ جگن موہن ریڈی نے بھی اچھوتا پورم ایس ای زیڈ  میں ری ایکٹر دھماکے پر گہرے غم میں مبتلا ہوں ۔ انہوں نے اس واقعہ میں مرنے والوں کے اہل خانہ سے دلی تعزیت کا اظہار کیا۔(جاری)

مہلوکین کے اہل خانہ کو مناسب امداد فراہم کرنے کا مطالبہ کرتے ہوئے وائی ایس آر کانگریس پارٹی کے سربراہ نے حکومت پر زور دیا ہے کہ وہ اس بات کو یقینی بنائے کہ زخمیوں کو اسپتالوں میں بہترین ممکنہ طبی علاج فراہم کیا جائے۔ انہوں نے حکام سے مستقبل میں ایسے واقعات کی روک تھام کے لیے فوری اقدامات کرنے کا مطالبہ بھی کیا۔ انہوں نے ریاستی حکومت سے مرنے والوں کے اہل خانہ کو مناسب امداد فراہم کرنے کا مطالبہ کیا۔