نوادہ تشدد: کیمپ میں رہنے پر مجبور دلت کنبہ، سرکار کا کھانا اور پولیس کی بندوقیں، پھر بھی دل میں ہے خوف

 

نوادہ : دلت کالونی میں 11 دن پہلے پیش آئے دل دہلا دینے والے واقعہ کے بعد آج بھی حالات معمول پر نہیں آسکے ہیں۔ کالونی میں اب بھی سیکورٹی فورسز تعینات ہیں اور ہر طرف کشیدگی ہے۔ تاہم امدادی اور بحالی کا کام انتظامی سطح پر جاری ہے۔ جب لوکل 18 کی ٹیم موقع پر پہنچی تو وہاں تعینات سیکورٹی اہلکاروں نے روک دیا اور بتایا کہ شوٹنگ کے لیے ڈسٹرکٹ مجسٹریٹ کی اجازت ضروری ہے۔ چند گھنٹے انتظار کرنے کے بعد بتایا گیا کہ میڈیا کو روکنے کا کوئی حکم نہیں جس کے بعد ہمیں وہاں جانے کی اجازت دیدی گئی ۔(جاری)

بستی کی موجودہ صورتحال

واقعے کے بعد کالونی کی صورتحال کافی حد تک واضح ہو چکی ہے۔ لوگوں کے قیام کے لیے ترپال اور ٹینٹ لگا کر انتظامات کئے گئے ہیں۔ انتظامیہ نے ہر خاندان کو 1 لاکھ 39 ہزار 250 روپے بطور معاوضہ دیا ہے۔ مقامی لوگ ابھی تک اس اندوہناک رات کی یادوں پر قابو نہیں پا سکے۔ واقعے کے دوران کالونی میں ایک اسکول، چرچ اور کئی مکانات مکمل طور پر جل گئے تھے۔(جاری)

مقامی لوگوں کا درد

ہماری گفتگو کے دوران مقامی لوگوں کا کہنا تھا کہ وہ اس واقعے کے بعد بھی خوفزدہ ہیں اور گھروں سے باہر نکلنے سے گریز کرتے ہیں۔ کچھ لوگوں کا کہنا تھا کہ اب وہ اکیلے باہر نہیں نکلتے اور پولیس کو اطلاع دینے کے بعد ہی باہر نکلتے ہیں۔ کاروبار بھی بری طرح متاثر ہوا ہے۔ راحت کے طور پر مقامی انتظامیہ نے دن میں دو وقت کا کھانا اور صبح کا ناشتہ فراہم کرایا ہے، جس میں کھچڑی جیسی سادہ چیزیں شامل ہیں۔(جاری)

انتظامیہ کی تیاری

انتظامیہ نے کالونی میں بجلی، پانی، واش روم اور ایمبولینس کی سہولیات فراہم کرائی ہیں۔ متاثرہ خاندانوں کو معاوضہ بھی دیا گیا ہے۔ لیکن سوال یہ پیدا ہوتا ہے کہ یہ مدد کب تک جاری رہے گی اور کیا اس سے کالونی کے لوگوں کو طویل مدتی راحت مل پائے گی؟(جاری)

انتظامیہ اور میڈیا کے درمیان تناؤ

انتظامیہ نے میڈیا پر برہمی کا اظہار کرتے ہوئے کہا کہ اس معاملے کو ضرورت سے زیادہ اہمیت دی جارہی ہے جس کی وجہ سے ان کی ڈیوٹی متاثر ہورہی ہے۔ تاہم میڈیا کا خیال ہے کہ وہ اپنا کام کر رہا ہے اور انتظامیہ کو اپنی ذمہ داری پوری کرنی چاہئے۔(جاری)

کالونی کے لوگ اب بھی اس رات کی ہولناکی سے باہر نکلنے کی کوشش کر رہے ہیں اور سوال یہ ہے کہ حکومت کی طرف سے یہ مدد کب تک جاری رہے گی اور انہیں معمول پر آنے کا موقع کب ملے گا۔ بتادیں کہ نوادا میں تقریبا دبنگوں کے ذریعہ دلت بستی میں آگ لگا دی گئی تھی، جس میں درجنوں گھر جل کر خاکستر ہوگئے تھے ۔