نئی دہلی : ہندوستان کے سابق وزیر اعظم ڈاکٹر منموہن سنگھ کا ندھن ہوگیا ہے۔ سانس لینے میں دشواری کی شکایت کے بعد انہیں دہلی ایمس لایا گیا تھا۔ انہیں ایمرجنسی وارڈ میں داخل کرایا گیا تھا۔ متعدد محکموں کی ٹیمیں ان کی صحت کی نگرانی کر رہی تھیں، لیکن انہیں بچایا نہیں جا سکا۔ دہلی ایمس نے سابق وزیر اعظم ڈاکٹر منموہن سنگھ کی موت کی تصدیق کرتے ہوئے بتایا کہ منموہن سنگھ کو رات 8:06 بجے اسپتال لایا گیا تھا۔ انہیں آئی سی یو میں رکھا گیا تھا، لیکن وہ جانبر نہ ہو سکے۔ انہوں نے 92 سال کی عمر میں رات 9 بج کر 51 منٹ پر آخری سانس لی۔(جاری)
سابق وزیر اعظم منموہن سنگھ کے ندھن سے پورا ملک صدمے میں ہے۔ ملک کے عظیم فرزند کے انتقال کے بعد ملک میں 7 روزہ قومی سوگ کا اعلان کیا گیا ہے۔ اس دوران ترنگا آدھا جھکا رہے گا۔ ڈاکٹر منموہن سنگھ کی آخری رسومات پورے سرکاری اعزاز کے ساتھ ادا کی جائیں گی۔ بتایا جا رہا ہے کہ منموہن سنگھ کی جسد خاکی کو پارٹی ہیڈکوارٹر میں آخری دیدار کے لیے رکھا جا سکتا ہے ۔ تاہم حتمی فیصلہ ان کے اہل خانہ سے بات چیت کے بعد کیا جائے گا۔(جاری)
وزیر اعظم نریندر مودی نے سابق وزیر اعظم ڈاکٹر منموہن سنگھ کے ندھن پر دکھ کا اظہار کیا ہے۔ وزیراعظم مودی نے ایکس پر لکھا کہ ہندوستان اپنے سب سے ممتاز رہنماوں میں سے ایک ڈاکٹر منموہن سنگھ جی کے انتقال پر سوگوار ہے۔ ایک عام خاندان سے اٹھ کر وہ ایک مشہور ماہر اقتصادیات بن گئے۔ وہ مختلف سرکاری عہدوں پر فائز رہے، جن میں وزیر خزانہ کا عہدہ بھی شامل ہے، اور انہوں نے گزشتہ برسوں میں ہماری اقتصادی پالیسی پر ایک مضبوط چھاپ چھوڑی۔(پڑھیں مودی کا ٹوئیٹ)
India mourns the loss of one of its most distinguished leaders, Dr. Manmohan Singh Ji. Rising from humble origins, he rose to become a respected economist. He served in various government positions as well, including as Finance Minister, leaving a strong imprint on our economic… pic.twitter.com/clW00Yv6oP
— Narendra Modi (@narendramodi) December 26, 2024
ڈاکٹر منموہن سنگھ مسلسل دو بار ملک کے وزیر اعظم رہ چکے ہیں۔ انہوں نے 2004 سے 2014 تک ملک کی باگ ڈور سنبھالی تھی۔ انہوں نے 2008 میں معاشی کساد بازاری کو بہت اچھے طریقے سے سنبھالا تھا۔ پوری دنیا نے ان کی صلاحیتوں کا لوہا تسلیم کیا تھا۔خیال رہے کہ وزیر اعظم کی کمان سنبھالنے سے پہلے منموہن سنگھ ہندوستان کے وزیر خزانہ اور فنانس سیکرٹری بھی رہ چکے ہیں۔ نرسمہا راؤ کی حکومت کے دوران معیشت کو ترقی دینے میں ان کا اہم کردار سمجھا جاتا ہے۔ منموہن سنگھ آر بی آئی کے گورنر بھی رہ چکے ہیں۔
اشاعتیں
0 تبصرے