جمعیۃ علماء ہند کی مجلس عاملہ کا ایک اجلاس 13 اپریل کو دہلی میں منعقد ہوا۔ اس دوران مجلس عاملہ نے وقف (ترمیمی) ایکٹ 2025 پر گہری تشویش کا اظہار کیا۔ مجلس کے مطابق یہ نہ صرف بھارتی آئین کی کئی دفعات (آرٹیکل 14، 15، 21، 25، 26، 29 اور 300-اے) کی خلاف ورزی ہے بلکہ وقف کے بنیادی ڈھانچے کو نقصان پہنچانے کی کوشش بھی ہے۔ اس قانون کا سب سے نقصان دہ پہلو 'وقف بائی یوزر' کو منسوخ کرنا ہے، جس کی وجہ سے تاریخی طور پر وقف کے طور پر استعمال کی جانے والی مذہبی جگہوں کے وجود کو خطرہ لاحق ہو گیا ہے۔ سرکاری رپورٹوں کے مطابق ایسی جائیدادوں کی تعداد چار لاکھ سے زیادہ ہے۔(جاری)
وقف قانون پر قرارداد
مجلس کا مزید کہنا ہے کہ: "اسی طرح مرکزی وقف کونسل اور ریاستی وقف بورڈ میں غیر مسلم بلکہ اکثریتی افراد کی شمولیت مذہبی معاملات میں کھلی مداخلت ہے، جو کہ بھارتی آئین کی دفعہ 26 کی کھلی خلاف ورزی ہے۔ ایسا قانون اکثریتی طبقے کے غلبے کی علامت ہے، جس کی ہم مکمل مخالفت کرتے ہیں۔ یہ ہمیں کسی بھی حال میں قابل قبول نہیں ہے۔ مزید یہ کہ مجلس عاملہ اس حقیقت کا اظہار کرتی ہے کہ موجودہ حکومت بھارت کے آئین کی روح اور اس کی بنیادی فکر کی خلاف ورزی کر رہی ہے۔ ہم پوری طرح سمجھتے ہیں کہ ایک پورے طبقے کو حاشیے پر ڈالنے، ان کی مذہبی شناخت مٹانے اور انہیں دوسرے درجے کا شہری بنانے کی منظم اور مذموم کوشش کی جا رہی ہے۔"(جاری)
مجلس عاملہ نے اس بات پر اطمینان کا اظہار کیا ہے کہ جمعیۃ علماء ہند کے صدر حضرت مولانا محمود اسعد مدنی نے اس قانون کو سپریم کورٹ میں چیلنج کیا ہے اور عدالت میں مؤثر پیروی کے لیے سینئر وکلاء کی خدمات لینے کی درخواست کی ہے۔ اجلاس نے بھارت سرکار سے مطالبہ کیا ہے کہ وقف قانون 2025 کو فوری طور پر واپس لیا جائے۔ حکومت کو یہ سمجھنا چاہیے کہ وقف اسلامی قانون کا ایک بنیادی جز ہے، جو قرآن و حدیث سے ماخوذ ہے۔ یہ دیگر عبادات کی طرح ایک دینی عمل ہے۔ اس میں کوئی بھی ترمیم قابل قبول نہیں ہو سکتی جو وقف کے دینی تشخص اور شرعی بنیاد کو متاثر کرے۔ ترمیم کی نیت ہمیشہ انتظامی اصلاحات پر مبنی ہونی چاہیے، جیسا کہ سابقہ چند ترامیم میں کیا گیا ہے۔(جاری)
مزید برآں اجلاس نے حکومت سے مطالبہ کیا کہ وہ شرعی معاملات میں کسی بھی طرح کی مداخلت سے گریز کرے اور ایسا قانون بنائے جو وقف کی حفاظت اور اس کی جائیدادوں کی بحالی کو یقینی بنائے۔ ساتھ ہی مجلس عاملہ نے حکومت اور اپوزیشن جماعتوں کی جانب سے وقف املاک اور مجوزہ ترامیم سے متعلق دیے گئے گمراہ کن بیانات کی سخت الفاظ میں مذمت کی ہے۔ مجلس نے کہا کہ میڈیا میں پھیلائے جانے والے ایسے گمراہ کن پروپیگنڈے کے جواب میں صحیح صورتِ حال ملک کے سامنے لانے کے لیے ہر ممکن اقدامات کیے جائیں گے۔ ساتھ ہی یہ بھی واضح کیا کہ پرامن احتجاج ایک آئینی اور بنیادی حق ہے۔ کسی بھی حکومت کو اسے روکنے کا اختیار نہیں ہے۔ وقف ایکٹ کے خلاف احتجاج کرنے والوں کو روکنا، ان کے خلاف قانونی کارروائیاں کرنا اور انتظامیہ کی جانب سے تشدد کا سہارا لینا انتہائی قابل مذمت ہے۔ اسی طرح احتجاج کے دوران تشدد کرنا بھی افسوسناک ہے، ایسے عناصر جو احتجاج کے دوران تشدد میں ملوث ہو رہے ہیں، وہ درحقیقت وقف کے تحفظ کی اس تحریک کو کمزور کر رہے ہیں۔ تمام ایماندار بھائیوں سے اپیل کی گئی ہے کہ ہر قسم کے گناہوں اور برائیوں سے بچ کر اللہ تعالیٰ سے زیادہ سے زیادہ دعا کریں۔(جاری)
یکساں سول کوڈ پر قرارداد
جمعیۃ علماء ہند کی مجلس عاملہ نے اتراکھنڈ میں یکساں سول کوڈ کے نفاذ اور مسلم پرسنل لا کو ختم کرنے کو مذہبی حقوق کی کھلی خلاف ورزی قرار دیا ہے۔ اتراکھنڈ کے بعد دیگر ریاستوں سے بھی ایسی خبریں آ رہی ہیں کہ وہاں بھی یکساں سول کوڈ کے تعلق سے سرکاری سطح پر کوششیں ہو رہی ہیں، جو کہ قومی سطح پر باعث تشویش ہے۔ یکساں سول کوڈ صرف مسلمانوں کا مسئلہ نہیں ہے بلکہ اس کا تعلق ملک کے مختلف سماجی گروہوں، برادریوں، ذاتوں اور تمام طبقوں سے ہے۔ مجلس نے کہا، "ہمارا ملک کثرت میں وحدت کی اعلیٰ مثال ہے، اگر ہمارے تنوع کو نظر انداز کر کے کوئی قانون بنایا گیا تو اس کا براہ راست اثر ملک کی یکجہتی اور سالمیت پر پڑے گا۔ یہی یکساں سول کوڈ کی مخالفت کی سب سے بڑی وجہ ہے۔"(جاری)
مسلم پرسنل لا کے تعلق سے مسلمانوں کی شدید حساسیت کا سبب یہ ہے کہ اسلامی شریعت زندگی کے تمام شعبوں اور سماجی و اخلاقی پہلوؤں پر اثر انداز ہوتی ہے۔ قرآن کریم کی ہدایات خالق کائنات کی طرف سے طے کی گئی ہیں اور ان میں کسی بھی قسم کی تبدیلی نہیں کی جا سکتی۔ مسلم پرسنل لا یا اسلامی خاندانی قوانین کو ختم کرنے کی کوشش جمہوریت کی روح اور بھارتی آئین میں دی گئی ضمانت کے خلاف ہے۔ جب اس ملک کا آئین بنایا جا رہا تھا، تو دستور ساز اسمبلی نے یہ ضمانت دی تھی کہ مسلمانوں کے مذہبی معاملات، خاص طور پر ان کے ذاتی قوانین میں کوئی مداخلت نہیں کی جائے گی۔ بھارتی آئین کے آرٹیکل 25 سے 29 کا مقصد اور ہدف یہی ہے۔(جاری)
مجلس کا کہنا ہے، "اس موقع پر یکساں سول کوڈ کے تعلق سے درج بالا اعتراضات کے ساتھ جمعیۃ علماء ہند کی یہ مجلس ضروری سمجھتی ہے کہ یہ بھی واضح کرے کہ شریعت میں مداخلت کا راستہ تبھی کھلتا ہے جب مسلمان خود شریعت پر عمل کرنے کے لیے تیار نہ ہوں۔ اگر مسلمان اپنی شریعت کے تمام احکام کو عملی زندگی میں نافذ کرنے کے لیے پرعزم رہیں، تو کوئی قانون انہیں اس سے روکنے کی طاقت نہیں رکھتا۔ لہٰذا تمام مسلمانوں سے اپیل ہے کہ اسلامی شریعت پر پوری طرح قائم رہیں۔ ساتھ ہی خواتین کے لیے اسلامی تعلیمات کے مطابق معاشرے میں مکمل انصاف کو یقینی بنائیں۔"(جاری)
سپریم کورٹ کی ہدایات کی خلاف ورزی پر قرارداد
جمعیۃ علماء ہند کی مجلس عاملہ نے سپریم کورٹ کی واضح ہدایات کی کھلی خلاف ورزی کرتے ہوئے ملک کی مختلف ریاستی حکومتوں کی جانب سے کیے جا رہے بلڈوزر ایکشن پر شدید تشویش کا اظہار کیا ہے۔ مجلس کا کہنا ہے، "حالانکہ سپریم کورٹ نے واضح طور پر ہدایت دی ہے کہ کسی بھی قسم کے انہدام سے قبل مکمل قانونی عمل، نوٹس اور متاثرہ فریق کو سماعت کا موقع فراہم کرنا لازمی ہے، اس کے باوجود حالیہ دنوں میں یہ افسوسناک رجحان دیکھنے میں آیا ہے کہ بغیر کسی پیشگی اطلاع یا قانونی کارروائی کے لوگوں، خاص طور پر کمزور، محروم اور مخصوص طبقے سے تعلق رکھنے والے افراد کے گھروں اور املاک کو نشانہ بنایا جا رہا ہے۔"(جاری)
اجلاس نے مزید کہا، "یہ مجلس سمجھتی ہے کہ اس قسم کی کارروائیاں نہ صرف قانون کی حکمرانی کی خلاف ورزی کرتی ہیں، بلکہ انصاف، مساوات اور جمہوریت کے ان بنیادی اصولوں کو بھی کمزور کرتی ہیں جن پر ہمارا جمہوری نظام قائم ہے۔ بلڈوزر کا استعمال سزا اور خوف کے طور پر ریاستی اداروں میں عوام کے اعتماد کو کمزور کرتا ہے اور من مانی و انتقامی کارروائیوں کو فروغ دیتا ہے۔ یہ مجلس ان تمام انہدامی کارروائیوں کی شدید مذمت کرتی ہے جو طے شدہ قانونی اصولوں کی خلاف ورزی کرتے ہوئے انجام دی گئیں۔ مجلس مطالبہ کرتی ہے کہ تمام آئینی ادارے، خاص طور پر عدلیہ، ان خلاف ورزیوں کا سنجیدگی سے نوٹس لیں اور ذمہ دار افراد کو قانون کے مطابق جواب دہ بنایا جائے۔"
اس میں کہا گیا، "اس کے علاوہ، مرکز اور ریاستی حکومتوں کی توجہ دلائی جاتی ہے کہ وہ ہر انتظامی اقدام میں آئینی اصولوں اور عدالتی ہدایات کی مکمل طور پر پیروی کو یقینی بنائیں، خاص طور پر ان کاموں میں جو عوام کی زندگی، روزی روٹی اور خود اعتمادی سے متعلق ہوں۔ یہ مجلس سماجی کارکنوں، وکلاء اور انسانی حقوق کی تنظیموں سے بھی اپیل کرتی ہے کہ وہ اس غیر قانونی طریقہ کار اور رواج کے خلاف آواز بلند کرتے رہیں اور تمام شہریوں کے آئینی حقوق کے تحفظ کے لیے متحد ہو کر کھڑے ہوں، چاہے ان کا تعلق کسی بھی ذات، مذہب یا برادری سے ہو۔"(جاری)
فلسطین پر اسرائیل کی کارروائی پر قرارداد
جمعیۃ علماء ہند کی مجلس نے غزہ میں جاری اسرائیل کے ظالمانہ رویے، جنگی جرائم اور معصوم فلسطینیوں کے قتل عام کو انسانیت کے خلاف سنگین جرم قرار دیا ہے۔ مجلس کے مطابق، "ہزاروں بچوں، خواتین اور شہریوں کا بے رحمانہ قتل بااثر عالمی طاقتوں اور بین الاقوامی اداروں کے لیے باعث تشویش اور شرمناک بے حسی کی علامت ہے۔ مجلس نے اس بات پر گہری تشویش کا اظہار کیا ہے کہ اسرائیل بین الاقوامی قوانین اور بنیادی انسانی اصولوں کی خلاف ورزی کرتے ہوئے نہ صرف فلسطینی علاقوں کا مکمل محاصرہ کیے ہوئے ہے بلکہ جنگ زدہ علاقوں میں خوراک، دوا اور زندگی کی بنیادی ضروریات کی فراہمی پر بھی مکمل پابندی لگا رکھی ہے، جو کہ جرم پر جرم کے مترادف ہے۔ اسرائیلی جارحیت صرف شہریوں تک محدود نہیں بلکہ صحافیوں، طبی کارکنوں، ایمبولینسوں، اسکولوں، مساجد، عبادت گاہوں، جامعات، پناہ گاہوں، اسپتالوں اور بنیادی ڈھانچے جیسے پانی، بجلی، مواصلات اور توانائی کے نظام کو بھی نشانہ بنایا جا رہا ہے۔"(جاری)
جمعیۃ علماء ہند کی مجلس نے مزید کہا، "یہ مجلس سمجھتی ہے کہ ان مظالم میں امریکہ بھی اسرائیل کا معاون ہے، جو مسلسل جارح اسرائیلی حکومت کو ہر سطح پر حمایت فراہم کر رہا ہے۔ ساتھ ہی کئی اسلامی ممالک کا سرد رویہ، غیر فعالیت اور غیر مؤثر طرز عمل بھی افسوسناک اور قابل مذمت ہے۔"
اس صورت حال میں جمعیۃ علماء ہند نے درج ذیل مطالبات کیے ہیں:
جمعیۃ علماء ہند بھارت حکومت سے پرزور مطالبہ کرتی ہے کہ وہ انسانی بنیادوں پر فوری مداخلت کرتے ہوئے جنگ بندی کو یقینی بنانے میں فعال کردار ادا کرے، خاص طور پر زخمی فلسطینیوں کے علاج و معالجے کے لیے ٹھوس اور مؤثر اقدامات کرے، اور غزہ میں محصور فلسطینی عوام تک بنیادی انسانی ضروریات کی فراہمی کے لیے ہر ممکن کوشش کرے۔
یہ مجلس مطالبہ کرتی ہے کہ اسرائیل پر جنگی جرائم اور انسانی حقوق کی سنگین خلاف ورزیوں کے لیے بھاری جرمانہ عائد کیا جائے اور متاثرہ فلسطینی عوام کو مکمل مالی معاوضہ دیا جائے۔
یہ مجلس بھارت حکومت، عرب لیگ اور تمام اسلامی ممالک سے اپیل کرتی ہے کہ وہ اسرائیلی مظالم کو روکنے کے لیے واضح، متحد اور مؤثر سفارتی، سیاسی اور قانونی دباؤ ڈالیں، تاکہ اس قابض ظالم حکومت کو اس کے جرائم کی سزا دی جا سکے۔
یہ مجلس عالمی برادری سے اپیل کرتی ہے کہ فلسطینیوں کے لیے ایک آزاد، خود مختار ریاست کے قیام کے لیے سنجیدہ، مؤثر اور عملی کوششوں کا آغاز کرے، اور ساتھ ہی یہ واضح کر دینا ضروری ہے کہ مسجد اقصیٰ پر اسرائیل کے قبضے کی کوئی بھی کوشش کسی بھی صورت میں قابل قبول نہیں۔
جمعیۃ علماء ہند نے ہمیشہ فلسطینی عوام کی آزادی، ان کے حق خود ارادیت اور ان کے مذہبی و انسانی حقوق کے تحفظ کی جدوجہد کے لیے اپنی آواز بلند کی ہے اور ان شاء اللہ کرتی رہے گی۔
اشاعتیں
0 تبصرے